У філіяле ´Харчавік-Агра´ нарыхтоўваюць травяны корм.

Да гэтай работы гаспадарка прыступіла першай у раёне. І па стане на панядзелак 800 тон сенажу па сучаснай тэхналогіі - у рулоны - ужо было занатавана.

- За корманарыхтоўку ўзяліся 5 мая, непасрэдна заварочваць у рулоны сталі 8-га, - дзеліцца галоўны аграном Валянціна Масолава. - Запланавана нарыхтаваць такім спосабам 1800 тон травяной масы, але мяркуем, што аб´ёмы гэтыя значна пераўзыдзем, пакладзем у межах 2-2,5 тысяч тон. Корм сябе выдатна зарэкамендаваў - якасны, не дае адходаў.

Ранняя нарыхтоўка травы ў гаспадарцы стала магчымай, па словах галоўнага агранома, дзякуючы кулісным пасевам зялёнаўкоснага жыта, рапсу і сурэпіцы. Іх у ´Харчавіку-Агра´ было 350 гектараў. На панядзелак няўбранымі заставалася 30 га. Менавіта з такіх пасеваў нарыхтавалі 700 тон сенажу ў рулоны, яшчэ 100 тон - на гектарах даўгалетняй пашы.

І сёлета, і ў мінулым годзе занатоўка травы ў рулоны - выключна на механізатары Аляксандры Ступені. ´Чалавек ён старанны, працавіты, - кажа пра земляроба галоўны інжынер Антон Рэдкі. - Сялянскую працу добра ведае, да яе асаблівасцей ставіцца з разуменнем - калі трэба, то і ў 5 раніцы гатовы прыступіць. Надзвычай адказна ставіцца да тэхнікі. Не перагружае, не чакае, калі той ці іншы механізм прывядзе да збою - рэгулярна агледжвае, своечасова абслугоўвае´. Незнарок і набыты ў мінулым годзе рулонны прэс-упакоўшчык Krone Сomprima CF 155 XС даверылі менавіта Аляксандру.

Зрэшты, корму для жывёлы ў гаспадарцы дастаткова яшчэ і леташняга, запас зрабілі на два гады.

- З парожніх - адна толькі сянажная траншэя, - дзеліцца Валянціна Якаўлеўна. - Каб не прэс для рулонаў (апошнія звозяць на адкрытыя пляцоўкі ля фермаў), то не было б куды і занатоўваць свежую траву.

Поўныя яшчэ і сенавалы. Аднак лугавое сена, як і штогод, нарыхтоўваць будуць: ніхто не ведае, якім будзе гэты і наступныя гады, а запас, як любяць тут казаць (і гэтага прынцыпу прытрымліваюцца), бяды не чыніць.

Не забываюцца ў ´Харчавіку-Агра´ і на догляд пасеваў. З бліжэйшых клопатаў - фунгіцыдная апрацоўка азімага рапсу на 250 гектарах, усё неабходнае для догляду маецца. У цэлым жа азімыя, па словах спецыяліста, не сказаць каб дрэнныя, але недахоп вільгаці адчувальны - добрага б дажджу ім. Што да яравых культур, то яны тут узышлі дружна. Хоць з першымі пасевамі ´прыйшлося павазіцца´: ячмень прыхвацілі маразы. Каб выправіць сітуацыю, давялося неадкладна падкарміць яго, cтаноўча на пасевы паўплываў і дожджык. Таму ў гаспадарцы спадзяюцца, што ўсё будзе добра, і ўраджай абавязкова парадуе.

У цэлым жа па раёне, па стане на ўчарашні дзень, ужо завяршылі сяўбу кукурузы, хімпраполку цукровых буракоў, тры дні як пасадзілі бульбу. Гэтым часам вядуцца хімпраполкі яравых збожжавых і зернебабовых культур, актыўна рыхтуецца сельгастэхніка, якая будзе задзейнічана ў нарыхтоўцы травянога корму. У той жа час дзве гаспадаркі - філіялы ´Харчавік-Агра´ і ´Варатынь´ ААТ ´БЗТДіА´ - нарыхтоўкай корму ўжо займаюцца. Таксама звыш адной тысячы тон сенажу з азімай сурэпіцы закладзена ў ААТ ´Саўгас Кісялевічы´ і прыкладна 500 тон такога корму - у ААТ ´Агракамбінат Бабруйскі´.

Усяго ж раёну сёлета трэба нарыхтаваць 74 тысячы тон кармавых адзінак травянога корму. Гэта прыкладна 14 тысяч тон сена, 119 тысяч тон сенажу і 932 тысячы тон сіласу.

Алена КАРПЕНКА. Фота аўтара.

иcтoчник: www.tribunapracy.by