Не прапусціць важнага.

Раённыя гаспадаркі пачалі сеяць кукурузу. У мэтах нагадаць пра тэхналагічныя патрабаванні да сяўбы менавіта на зерне - задача стаіць прытрымлівацца апошняга нават у дробязях - на базе філіяла ´Агракамбінат КХП´ ААТ ´Бабруйскі камбінат хлебапрадуктаў´ у мінулую пятніцу прайшоў куставы семінар-нарада на гэтую тэму.

Арганізатарам мерапрыемства выступіў саветнік старшыні Магілёўскага аблвыканкама Барыс Клешчукевіч, удзел прынялі намеснікі начальнікаў па раслінаводстве і механізацыі Бабруйскага, Глускага, Кіраўскага, Асіповіцкага, Клічаўскага і Быхаўскага райсельгасхарчаў, галоўныя аграномы і галоўныя інжынеры сельгасарганізацый.

На полі паблізу пасёлка Леніна ўдзельнікам яшчэ раз нагадалі пра асаблівасці падрыхтоўкі глебы пад сяўбу кукурузы на зерне, нормы высейвання насення, яго раскладку, глыбіню заладкі, іншыя тэхналагічныя моманты, здольныя прывесці да максімальна высокай ураджайнасці культуры. Якаў Яроцкі, кандыдат тэхнічных навук, дырэктар цэнтра павышэння кваліфікацыі кіруючых работнікаў і спецыялістаў камітэта па сельскай гаспадарцы і харчаванню аблвыканкама, як заўжды, у дэталях распавёў і паказаў, як павінна быць настроена сеялка, якімі тэхнічнымі патрабаваннямі нельга грэбаваць.

Падчас пасяджэння ў Гарбацэвіцкім сельскім Доме культуры прадстаўнікі кампаніі ´ЗемлякоФФ´ распавялі пра прымяненне сродкаў аховы раслін на працягу росту кукурузы. Звярнулі ўвагу на асаблівасці догляду культуры прымяняльна да ўмоў сёлетняга года.

Па стане на раніцу ўчарашняга дня ў раёне было пасеяна 1000 га кукурузы на зялёны корм і зерне з 6800 га запланаваных.

- Час для сяўбы культуры аптымальны, - адзначыла начальнік вытворчага аддзела райсельгасхарчу Жана Жукоўская. - Дажджоў няма, таму пастаўлена задача сяўбу паскорыць: выкарыстаць наяўную ў глебе вільгаць. Болей таго, рэкамендацыя тэхнолагаў і вучоных - сеяць так, каб зярноўка сутыкалася з вільготным слоем глебы.

Алена КАРПЕНКА.

иcтoчник: www.tribunapracy.by