иcтoчник: www.tribunapracy.by
Заўтра школьнікі раёна прыступяць да засваення вучэбных прадметаў у новым навучальным годзе. Каб працэс навучання быў зладжаным, а ўмовы знаходжання дзяцей ва ўстановах адукацыі камфортнымі і бяспечнымі, звычайна рупяцца шматлікія службы і непасрэдна аддзел па адукацыі Бабруйскага райвыканкама. Якая работа ў гэтым плане праведзена сёлета, мы пацікавіліся ў начальніка аддзела па адукацыі райвыканкама Алесі Стэльмак.
- Алеся Сяргееўна, ці чакаюцца змены ў структуры адукацыйнай сеткі раёна?
- Змен няма, структура адукацыйнай сеткі раёна захавана. У 2023/2024 навучальным годзе адукацыя раёна будзе прадстаўлена 24 установамі. З іх 13 - агульнай сярэдняй адукацыі, 6 - дашкольнай, а таксама дзяржаўная вучэбна-метадычная ўстанова ´Бабруйскі раённы вучэбна-метадычны кабінет´, дзяржаўная ўстанова дадатковай адукацыі ´Цэнтр творчасці Бабруйскага раёна´, дзяржаўныя ўстановы адукацыі ´Цэнтр карэкцыйна-развіваючага навучання і рэабілітацыі Бабруйскага раёна´, ´Бабруйскі раённы сацыяльна-педагагічны цэнтр´, ´Аздараўленчы лагер ´Бабраня-2010´.
- Колькі дзяцей плануецца ахапіць адукацыйным працэсам?
- Адукацыйным працэсам у раёне будзе ахоплена 1557 дзяцей, у тым ліку 1213 навучэнцаў і 344 выхаванцы.
- Ці дастаткова педагагічных кадраў і ці заступіць на працоўнае месца моладзь? Маю на ўвазе маладых спецыялістаў, для каго сёлетні навучальні год стане першым у працоўнай біяграфіі.
- Педагагічнымі кадрамі раён укамплектаваны. Адукацыйны працэс ва ўстановах агульнай сярэдняй адукацыі забяспечваюць 229 чалавек, ва ўстановах, якія рэалізуюць праграму дашкольнай адукацыі - 37. Прыйшло 14 маладых спецыялістаў, з якіх 8 навучаліся па мэтавым накіраванні. І гэта большыя лічбы, чым у папярэднім навучальным годзе, калі ў раён прыбылі 7 маладых спецыялістаў (4 - па мэтавым накіраванні).
- Што ўжо зроблена і што прадпрымаецца ў гэтыя дні для ўмацавання матэрыяльна-тэхнічнай базы ўстаноў адукацыі?
- Аддзелам па адукацыі, Цэнтрам па забеспячэнні дзейнасці бюджэтных арганізацый Бабруйскага раёна, непасрэдна ўстановамі адукацыі на працягу года выконваюцца мерапрыемствы, накіраваныя як на ўмацаванне матэрыяльна-тэхнічнай базы, так і на забеспячэнне бяспечнай эксплуатацыі, падтрымкі ў належным санітарна-тэхнічным і эстэтычным стане ўстаноў адукацыі. Ход падрыхтоўкі да новага навучальнага года і да работы ў восеньска-зімовы перыяд кантралюе створаная распараджэннем старшыні райвыканкама камісія па праверцы гатоўнасці ўстаноў адукацыі, у складзе якой - прадстаўнікі райвыканкама, занальнага цэнтра гігіены і эпідэміялогіі, Бабруйскага аддзела Дэпартамента аховы Міністэрства ўнутраных спраў. Камісія вывучала падрыхтоўку ўстаноў адукацыі да новага навучальнага года па розных накірунках: умацаванне і развіццё матэрыяльнай базы, падрыхтоўка да восеньска-зімовага перыяду, падрыхтоўка харчблокаў, выкананне правілаў аховы працы, пажарнай бяспекі, санітарна-гігіенічных нормаў, падрыхтоўка спартыўнай базы, добраўпарадкаванне тэрыторый. Па стане на 18 жніўня падпісана 13 сертыфікатаў (100 працэнтаў) гатоўнасці школ і сертыфікат дзіцячага сацыяльнага прытулка ДУА ´Бабруйскі раённы сацыяльна-педагагічны цэнтр´. На падрыхтоўку ўстаноў сёлета былі прадугледжаны немалыя бюджэтныя асігнаванні, а таксама сродкі школ ад дзейнасці, якая прыносіць прыбытак.
- Нашым чытачам, упэўнена, будзе цікава пачуць, якія дакладна работы праведзены?
- У 2023 годзе выкананы капітальны рамонт з мадэрнізацыяй Каменскай сярэдняй школы ў рамках праекта ´Мадэрнізацыя сістэмы адукацыі Рэспублікі Беларусь´. У рамках цякучага рамонту там жа адрамантаваны калідор 2-га паверха і вестыбюль 1-га паверха, набыта і ўсталявана санітарна-тэхнічнае абсталяванне. Падчас падрыхтоўкі ўстаноў да навучальнага года адрамантавана накрыццё Бортнікаўскай і Міхалёўскай сярэдніх школ, часткова фасад, вадасцёкавая сістэма, падшыўка накрыцця дзіцячага садка аг. Кавалі, заменена накрыццё падлогі ў вучэбных кабінетах Брожскай і Хімоўскай СШ. У кабінетах Ленінскай і Варатынскай школ усталяваны жалюзі. У двух кабінетах Осаўскай БШ, Міхалёўскай і Хімоўскай сярэдніх школ заменены аконныя блокі. У Брожскай СШ праведзена замена свяцільняў, у Варатынскай школе і дзіцячым садку аграгарадка - частковы рамонт агароджы. У Бортнікаўскай, Брожскай, Варатынскай, Глушанскай, Гарбацэвіцкай, Ленінскай і Туркоўскай школах выкананы рамонты вучнёўскай мэблі. І гэта далёка не поўны пералік мерапрыемстваў, праведзеных ва ўстановах адукацыі ў мэтах падрыхтоўкі да навучальнага года.
- Асобна хацелася б запытацца пра харчаванне школьнікаў. Ці будзе мець працяг эксперымент, праведзены ў шэрагу школ краіны?
- Эксперымент праводзіўся з 19 снежня 2022 г. па 31 мая 2023 г. У ім удзельнічала 21 установа адукацыі краіны. Мэта - апрабацыя новых тэхналогій і прынцыпаў арганізацыі школьнага харчавання. Як вынік - з 1 верасня на новыя прынцыпы арганізацыі школьнага харчавання пераходзіць 7 раённых школ, да 1 верасня 2024 года плануецца перавод астатніх. Матэрыяльна-тэхнічная база харчблокаў дазваляе гэта зрабіць. Тым болей што ў ліпені мы набылі 2 адзінкі халадзільнага абсталявання для Глушанскай і Цялушскай СШ, рэзку для агародніны - для Ленінскай СШ. У 4-м квартале пры наяўнасці фінансавых сродкаў плануем набыць посудамыйную машыну для Хімоўскай СШ і электраскавараду для Брожскай.
- Як абстаяць справы са спартыўнай гаспадаркай устаноў адукацыі? Для вясковых дзяцей гэта асабліва актуальна.
- Спартыўнай базе нададзена вялікая ўвага. Прыведзены ў належны стан школьныя стадыёны, спартыўныя ўзвядзенні і іншыя элементы спартыўнай інфраструктуры. У прыватнасці, выкананы цякучы рамонт спартыўных залаў, абсталявання і металічных канструкцый гімнастычных гарадкоў, добраўпарадкаванне школьных стадыёнаў і прылягаючай тэрыторыі, абноўлены разметкі на спартыўных пляцоўках усіх тыпаў. Асабліва значная работа праведзена ў Глушанскай СШ. Хоць забеспячэнне ўстаноў адукацыі спартыўным інвентаром складае 100 працэнтаў, ставім сабе за мэту абнавіць яго.
- Наколькі арганізаваны падвоз навучэнцаў?
- Для гэтых мэт у нас маецца 11 школьных аўтобусаў, з якіх адзін новы (у Цялушскай СШ), і 1 рэзервовы - на выпадак рамонту. Школьныя аўтобусы абсталяваны відэарэгістратарамі, застрахаваны і двойчы на год праходзяць тэхнічны агляд.
- Пытанне пра адзіную школьную форму. Ці будзе яна ўведзена ў раёне?
- З новага вучэбнага года ў раённых установах адукацыі будзе ўведзена адзіная школьная форма. Інфармаванне бацькоў на гэты конт вялося на працягу года. Абмеркавалі пытанне і на агульнашкольных бацькоўскіх сходах. Бацькам і дзецям былі прапанаваны мадэлі формы беларускіх вытворцаў. Праведзена анкетаванне з навучэнцамі і іх законнымі прадстаўнікамі па пытанні выбару мадэляў і каляровай гамы. Інфармацыя, да якога выніку прыйшлі, маецца на афіцыйных сайтах устаноў адукацыі, а таксама ў бацькоўскіх групах, створаных у ´Вайбер´, ´Тэлеграм´.
- Бяспека дзяцей. Наколькі яна забяспечана ў раённых установах адукацыі?
- Здароўе і жыццё дзяцей - самае галоўнае, таму і меры па іх захаванні прадпрымаюцца самыя сур´ёзныя. У ліпені, згодна з графікам на 2021-2025 г. г., праведзена абследаванне Міхалёўскай, Цялушскай, Бортнікаўскай і Гарбацэвіцкай сярэдніх школ. Збудаванні прызнаны прыгоднымі для далейшай эксплуатацыі па прызначэнні. Для забеспячэння выканання патрабаванняў заканадаўства аб пажарнай бяспецы ўстановы адукацыі абсталяваны сучаснымі сістэмамі пажаратушэння, сістэмай апавяшчэння людзей пра пажар і сістэмай аўтаматычнай пажарнай сігналізацыі. Супрацьпажарны інвентар, пярвічныя сродкі пажаратушэння, сістэмы водазабеспячэння, вентыляцыі, пажарныя краны, электраабсталяванне - спраўныя. Пры гэтым у мэтах узмацнення пажарнай бяспекі набыта 30 самаратавальнікаў. Ва ўсіх установах адукацыі маюцца кнопкі трывожнай сігналізацыі, у 9 установах усталяваны сістэмы відэаназірання. Арганізавана работа па выкананні прапускнога рэжыму, прыняты меры па недапушчэнні ў пабудовы і на тэрыторыю ўстаноў адукацыі старонніх людзей. Тэрыторыі агароджаны, вароты пастаянна зачынены, уезд на тэрыторыю дазволены толькі спецыялізаванаму транспарту. Дахі, падвалы, дапаможныя памяшканні пастаянна зачынены.
Размову вяла Алена КАРПЕНКА.
